bng.xinzodalimia

En decembro do ano 2004 aprobouse co apoio de todos os grupos municipais do Concello de Xinzo, unha moción urxente do Bloque Nacionalista Galego para destinar unha partida orzamentaria a axudar ás vítimas do maremoto no suleste asiático. Nos anos 2005, 2006 e previsiblemente 2007 o goberno municipal do PP deixou esta partida, que ronda os 3.000€ anuais, pendente de aplicación, por isto pensamos que é o momento de dar outro paso e solicitar a inclusión do noso concello no Fondo Galego de Cooperación e Solidariedade.

O Fondo é unha asociación de carácter municipalista creada en 1997 que agrupa hoxendía a preto dun cento de concellos e tres deputacións provinciais unidos pola preocupación de levar adiante iniciativas de cooperación e solidariedade cos países menos desenvolvidos. A obxectivo é ir máis alá da urxencia que se xenera diante de calamidades, catástrofes ou guerras, e abordar tamén programas estábeis e permanentes dirixidos ao desenvolvemento estrutural dos países que precisan desa axuda e apoio internacional.

Asemade, consideramos que no seu momento a aprobación do 0,07% do orzamento anual supuxo un fito destacable para o noso Concello, mais deberiamos esforzarnos por continuar avanzando neste camiño e achegarnos ao porcentaxe do 0,7% recomendado polas Nacións Unidas.

• Texto íntegro da moción (pdf, 102kb)

Referencias:

• Fondo Galego de Cooperación e Solidariedade: www.igadi.org/fondogalego

No mes de outubro o goberno do PP no Concello de Xinzo aprobou en solitario unha revisión de taxas e impostos. Esta modificación foi plantexada de xeito apresurado e sen dar tan sequera tempo aos grupos da oposición de revisar e estudar a documentación aportada para poder ter unha opinión formada, feito que nós denunciamos no seu momento co xesto de abandonar o pleno no que foi tratada. Logo dunha análise a fondo, o Bloque Nacionalista Galego de Xinzo valora a suba, no seu conxunto, como desproporcionada para ser acometida globalmente e pouco acorde coa cacarexada política popular a nivel estatal de baixada de impostos.

• As subas máis importantes, dende o punto de vista da súa incidencia nas arcas municipais, son as relacionadas cos vehículos. O Imposto sobre os Vehículos de Tracción Mecánica (IVTM) increméntase un 40% e suporá uns ingresos extra de máis de 110 mil euros anuais, mentres que as taxas por pasos privativos de vehículos e por reservas de estacionamento aumentan un 26%.
• Os prezos no Conservatorio e na Escola de Gaitas medran espectacularmente, pasando dos 144€ que custaba a matrícula ordinaria no grao elemental no 2005, aos 200€, é dicir, un 39% en dous anos, moi por riba do incremento do IPC.
• O Imposto sobre Bens Inmobles (IBI) de Rústica iguálase ao de Urbana e queda no 0,40; o Imposto sobre o Incremento de Valor dos terreos de Natureza Urbana sube un 17% e as taxas pola concesión de licenzas urbanísticas multiplícanse directamente por dous.
• Outras taxas que tamén sofren fortes alzas son as de “Postos de venda, barracas, etc”. (suben un 122%), a de “Ocupación da vía pública con mesas e cadeiras” (sube un 175%), a “Taxa de marquesiñas, rótulos e toldos” e a de “Uso de recintos deportivos”. Nesta última soben todos os capítulos unha media dun 60% excepto, curiosamente, o referido a “usos extradeportivos” que se redondea á baixa e queda en 600€ por evento. Casualmente é o PP quen debe aboar con máis asiduidade esta taxa, xa que utiliza habitualmente o Pavillón de Deportes para os seus actos electorais.
• O custo repercutido aos beneficiarios do servizo de Axuda no Fogar aumenta un 108%, pasa dos 4,80€/hora aprobados no 2000 a 10€/hora.

Como conclusión final dicir que podemos estimar que con esta suba de taxas e impostos o Concello de Xinzo incrementará os seus ingresos en 300 mil euros anuais o cal, lamentablemente, non repercutirá nunha mellora apreciable na calidade dos servizos prestados aos veciños debido á falla de dirección política de Isaac Vila e o goberno do PP.

• Nota de imprensa (pdf, 91kb)
• Análise-resumo da incidencia das modificacións de taxas e impostos (pdf, 168kb)

O conselleiro do Medio Rural, Alfredo Suárez Canal, e o director xeral de Estruturas e Infraestruturas Agrarias, Xosé Carballido Presas, presentaron o Plan Especial de Infraestruturas para a comarca da Limia, ao que se destinarán preto de 6 millóns de euros, unha actuación que “suporá un impulso definitivo para converter esta zona como un referente na produción agraria do País”, segundo o titular da Consellería de Medio Rural.

Segundo o conselleiro, “este paquete de actuacións constitúe o respaldo definitivo para o despegue da comarca da Limia” e vai preparar a comarca da Limia para afrontar os retos da agricultura do século XXI.

Entre as medidas que contempla este Plan Especial de Infraestruturas, destaca a consolidación do proceso de concentración parcelaria na comarca, que contará cun investimento de 3,3 millóns de euros que permitirán afondar na reorganización da base territorial das explotacións para facelas máis rendibles.

O Plan para a consolidación de infraestruturas, cun orzamento de 1,7 millóns de euros, permitirá manter a rede de infraestruturas agrarias da Limia e incrementar a viabilidade das explotacións. As actuacións previstas abranguen máis de 109.000 metros de terreos da comarca e comprenden a mellora dos camiños agrícolas máis importantes para facilitar o tránsito da maquinaria e o transporte das producións agrarias aos centros de comercialización, así coma a limpeza de cunetas e beiravías e a mellora da drenaxe dos desaugadoiros.

O Programa de Infraestruturas do Medio Rural, PEIM, busca mellorar e dignificar a calidade de vida da poboación rural. O seu orzamento para esta comarca ascende a 969.000 euros, que se van destinar a reforzar e a complementar as actuacións do Plan Especial de Infraestruturas. En concreto, dedicaranse fundamentalmente ao rasanteo da explanada dos camiños, ao aporte de novo firme asfáltico, á roza de cunetas e beiravías, así como actuacións na rede de saneamento. Unhas accións que roldan preto de 23.000 metros de terreo dos diferentes concellos da Limia.

Referencias:

• Consellería do Medio Rural (12/12/2007): Suárez Canal destaca que a Limia se converterá nun verdadeiro referente de produción agraria co impulso do Plan Especial de Infraestruturas para esta comarca
• La Región (13/07/2007): Un plan especial de Medio Rural reorganiza la superficie agraria para hacerla más rentable
• La Voz de Galicia (13/07/2007): A Xunta achega 6 millóns para reforzar a agricultura limiana

Á vista das variacións de crédito destinadas a financiar o sobrecusto en persoal -aprobadas onte polo Alcalde, Isaac Vila, e o goberno do PP- o Bloque Nacionalista Galego de Xinzo lamenta a inexistente dirección política, a falla de ideas e proxectos, a mala xestión, a ausencia de previsión e a nula planificación que sofre o noso Concello.

• O Concello de Xinzo conta cunha plantilla de persoal totalmente sobredimensionada e o número de traballadores medra sen parar xa que pasou dunha cifra de 91 a inicios do ano 2006 a 133 no comezo do 2007. Isto supón un incremento dun 46%, máis de 40 incorporacións nun único ano.
• No ano 2006 o crédito definitivo consignado na partida de gastos de persoal ascendeu a 2,91 millóns de euros e representou un 35,4% sobre o total de gastos previstos. No 2007, despois destas modificacións de crédito, a partida definitiva chegará a 3,3 millóns e, previsiblemente, superará amplamente o 40% do orzamento. Nun único ano verase incrementada en máis de 400 mil euros, é dicir, nun 14,5%.
• Para financiar estas variacións de crédito unha vez máis as partidas que sofren as baixas son fundamentalmente as destinadas a obras, o cal producirá efectos negativos sobre a calidade de vida dos cidadáns e deixará en suspenso moitos pequenos traballos reclamados polos veciños. Un dos damnificados con nome propio será o Museo Galego do Entroido, sistematicamente esquecido dende que Isaac Vila retomou a xestión municipal no 2003.
• Deixando a un lado cifras globais e porcentaxes, hai un dato que proporciona unha idea máis próxima do custo que soporta o Concello cos seus traballadores: cada veciño aportou do seu peto 291€ o ano pasado para gastos de persoal e este ano deberá desembolsar máis de 330€.

• Nota de imprensa (pdf, 88Kb)

Referencias:

• La Región (01/12/2007): El pleno de Xinzo aprueba una modificación de créditos por 525.000 euros para personal