bng.xinzodalimia

No Pleno ordinario celebrado hoxe presentamos, como xa anunciamos hai uns días, unha alternativa para dotar economicamente o Concurso do Cartel do Entroido 2009. A finalidade desta moción era dar unha alternativa viábel ao anuncio da Concellaría de Cultura da eliminación deste premio, ao tempo que denunciamos a falla de rigor e de creatividade do actual responsábel que sempre “tira” polo camiño máis doado evidenciando unha total ausencia de ideas.

O sentido da outra moción presentada neste mesmo pleno era procurar unha redución nos gastos correntes do Concello para afrontar as sempre adiadas medidas de contención e saneamento que as contas municipais veñen reclamando dende hai moitos anos. O grupo de goberno comprometeuse a levar a comisión un plan amplo de cara ao vindeiro exercicio e agardaremos o momento de coñecelo.

• Moción Premio do Concurso para o Cartel do Entroido 2009 (pdf, 76kb)
• Moción conxelacion dietas altos cargos e outras medidas de austeridade e compromiso social para o exercicio 2009 (pdf, 76kb)

Referencias:

• La Región (01-11-2008): El cartel del Entroido será pagado en Xinzo con dietas de un pleno de los 11 ediles

Dentro do proxecto aprobado polo Ministerio de Fomento para as obras de mellora da urbanización e da seguridade viaria da Travesía de Xinzo de Limia, do p.q.199+000 ao 200+400 da N-525 está incluída a substitución da intersección da N-525 coa Avenida de Celanova (OU-531) por unha glorieta. Nos pasados días técnicos da empresa adxudicataria estiveron facendo traballos de replantexamento desta obra que espertaron inquietude entre os veciños da zona xa que a mesma invade grande parte da beirarrúa deixando un estreito paso. Por este motivo solicitamos se dea conta na vindeira reunión da Comisión Informativa de Urbanismo e Obras da situación desta obra, así como do proxecto de execución da mesma e as alternativas existentes para coñecemento de todos os grupos políticos do Concello.

• Escrito presentado no Concello (pdf, 1.32Mb)

A celebración do Salón Monográfico da Pataca (24-25-26 de outubro) suporá a paralización de todas as actividades (deportivas, de animación sociocomunitaria, ximnasia de mantemento, aerobic, ligas de distintos deportes e niveis, ligas de veteranos, etc.) que acolle o Pavillón Municipal de Xinzo durante 15 días, xa que este é o tempo que precisarán a montaxe, celebración e desmontaxe do devandito salón monográfico.

O BNG denuncia a falla de previsión do grupo de goberno ‘popular’ e a descoidada organización deste tipo de eventos sectoriais a costa de paralizar toda a programación que centraliza o Pavillón, sobor de todo cando se podían procurar alternativas como era a posibilidade de negociar coa Consellería de Educación, a través da Delegación Provincial, o traslado provisional de toda esta actividade aos Pavillóns dos I.E.S. Lagoa de Antela e Cidade de Antioquía, o cal non se fai por simple falla de motivación e de ideas.

Coa intención de paliar esta situación e os perxuízos dela derivados o Grupo Municipal do BNG de Xinzo presentará unha iniciativa no Concello instando ao Sr. Alcalde a que tome con carácter urxente as medidas oportunas para trasladar a unha ubicación alternativa todas estas actividades e, de non ser posíbel, acelerar todos os traballos para que o pavillón permaneza inutilizado o menor tempo posíbel.

• Escrito presentado no Concello (pdf, 64kb)
• Nota de imprensa (pdf, 82kb)

O recente anuncio por parte da Concellaría de Cultura do Concello de Xinzo da eliminación da dotación económica (600€) do Concurso do Cartel promocional do Entroido debido á mala situación económica crónica, supostamente agravada pola crise da globalización, ademais de resultar incríbel e ata ridícula, é un síntoma inequívoco do cansazo, hastío, falla de motivación e creatividade que amosan, sen prexuízo algún, o Grupo de Goberno do PP.

Desde o BNG de Xinzo pensamos que unha manifestación cultural desta envergadura, festa declarada de Interese Turístico Nacional, merece todos os esforzos, toda a ilusión e toda a vontade posíbeis, e por ilo proporemos, como medida paliativa deste despropósito, que a dotación económica deste Premio se faga con cargo á partida do orzamento destinada a pagar aos altos cargos por asistencias a órganos corporativos ou adicacións exclusivas, deste xeito poderemos ofertar unha cantidade atrainte que poida mellorar o nivel artístico dos últimos anos sen sobrecargar as depauperadas arcas municipais.

Renunciar á procura da excelencia para unha das nosas sinais culturais e identitarias máis singulares, como é o Entroido, primando o mellor traballo, o mellor artista que plasme, sintetice e divulgue a nosa festa, é cando menos ofensivo e ata obsceno, e sen dúbida, sinal clara do estado de fin de ciclo no que o goberno do PP de Xinzo se atopa. Un grupo de Goberno así, ancorado na desmotivación absoluta, no lucro inerte e na rutina institucional máis estéril posúe o grande risco de lastrar con estas mesmas condenas o futuro do seu Concello, e sen dúbida, desde esta desoladora perspectiva só cabe albiscar unha nova fronteira, un cambio de ciclo, unha opción de mellora.

• Nota de imprensa (pdf, 84kb)

O pasado día 5 de outubro asistiamos, abraiados, ao anuncio do Concello de Xinzo en conivencia coa Deputación Provincial, ambos rexentados polo Partido Popular, da próxima urbanización de 200 novas parcelas no Parque Empresarial que serán vendidas un 30% máis baratas que as 21 recentemente rematadas por Xestur na 4ª fase.

Esperta certa suspicacia e réstalle moita credibilidade o feito de que este anuncio se produza aos poucos días da posta en marcha do novo “chiringuito” de Baltar baixo a forma terreal de Sociedade de Xestión do Solo. Máis semella unha “oferta de lanzamento” que un proxecto serio con posibilidades de materializarse sobre o terreo, sobre todo nestes tempos nos que os ventos da economía non sopran favorábeis. Por outra banda prodúcenos certa inquedanza o grande interese que amosa este recén criado organismo por operar en Xinzo, novamente, pois hai que lembrar que a xestión do chan industrial do PP xa deu boas mostras no pasado da súa ineficacia, desleixo e falla de control diante da lacra da especulación, deixando a finais dos noventa no noso concello un parque xerminal, varado na súa primeira fase e cercenado pola usura dos pseudoinvestidores de turno, cuxas consecuencias aínda son visíbeis hoxe nas parcelas que non chegaron a ver medrar ningún proxecto empresarial.

• Nota de imprensa (pdf, 84kb)

Relacionadas:

• [29-12-2006] Ampliación do Parque Empresarial de Xinzo
• [14-02-2008] A Consellería de Vivenda e Solo anuncia a creación dun segundo Parque Empresarial no Concello de Xinzo de Limia cunha superficie total de 700.000 m

Referencias:

• La Región (16-10-2008): El BNG propone al alcalde de Xinzo contratos para la venta de suelo industrial
• La Región (05-10-2008): La Diputación ofertará suelo industrial en Xinzo un tercio más barato que el de Xestur
• La Región (15-02-2008): La demanda de suelo industrial lleva a Vivenda a planificar otro parque empresarial en Xinzo