bng.xinzodalimia

Após longos anos de desleixo gobernativo xa é tempo de rescatar o espazo arquitectónico máis senlleiro do noso concello e no BNG estamos a traballar para acadar este obxectivo. Por iso, convidámosvos ao Acto de Presentación da Proposta do BNG para a Recuperación do Mosteiro de Trandeiras que celebraremos o vindeiro 28 de novembro, ás 12 da mañá, no Claustro do propio Mosteiro.

A nosa intención última é lanzar unha chamada de atención á sociedade limiá pola situación de histórico esquecemento, ao tempo que ofrecemos unha solución viábel de recuperación e posta en valor deste conxunto encadrándoo, como peza angular, nun proxecto máis amplo de difusión e aproveitamento do potencial turístico da comarca.

• Tarxeta-convite (jpeg, 256kb)

As obras de execución do ansiado proxecto de ampliación, urbanización e mellora da Avenida de Portugal de Xinzo, proxecto a cargo da Consellaría do Medio Ambiente, Territorio e Infraestruturas da Xunta de Galiza, e dilatado máis de 15 anos, non comezan de xeito ordenado, racional e satisfactorio para o interese colectivo.

O Grupo Local do BNG lamenta profundamente que a hora de iniciar unhas obras tan necesarias e agardas o Concello optase por permitir finalmente a tala masiva e indiscriminada de todas as especies arbóreas que delimitan ambas marxes dos 1,5 quilómetros de travesía a arranxar. Esta decisión de talar todas os árbores contradice e incumpre o proxecto de execución aprobado xa fai un ano en pleno, por unanimidade de todos os grupos da Corporación, ao tempo que choca frontalmente coa vontade inicial da proposta de máximo respecto polas especies de gran porte e senlleiras e da aplicación de talas só no caso de inevitábel imperativo técnico ou pola proximidade excesiva aos inmóbeis da veciñanza.

O BNG puido comprobar estes días que as talas efectuadas non só non se axustan á memoria do proxecto, no referente a executarse con todas as garantías ambientais e como medida sumaria e imprescindíbel por imperativo técnico, senón que ademais vulnera a protección mesma que fixa o PXOM (prohibe talar especies de máis de 25 anos) ao efectuarse de xeito indiscriminado, masivo e continuo.

Ante esta lamentábel situación o Grupo Local do BNG solicitará unha aclaración da Presidencia e da Concellaría de Medioambiente e Urbanismo do Concello de Xinzo acerca das causas que están a motivar unhas talas desta envergadura.

• Nota de imprensa (pdf, 92kb)

Referencias:

• La Voz (25-11-2009): La obra de mejora de una carretera en Xinzo obliga a talar decenas de árboles
• La Región (26-11-2009): Tala de árboles para reformar la avenida de Portugal de Xinzo
• La Voz (26-11-2009): Los partidos políticos de Xinzo justifican una tala para mejorar servicios y seguridad
• Ourense Dixital (27-11-2009): Tala masiva en la Avenida de Portugal de Xinzo de Limia para las obras de ampliación del vial

O PP aprobou hoxe o Decreto polo que se declara a ZEPA na Limia. O mentiroso de Feijóo, que prometera en campaña que non habería zepa, logo de reunirse consigo mesmo e cos alcaldes do PP na Limia e consensuar entre todos o mellor xeito de facerlle tragar a pílula de tamaño muiñeiril aos veciños e veciñas da comarca, ven de impoñer unilateralmente, sen consenso, sen información, sen transparencia, sen diálogo e sen negociación unha ZEPA para A Limia. A mesma ZEPA que con vehemencia combatiu o noso alcalde, Isaac Vila, que hai un ano profetizaba a “ruina para o comercio, a agricultura e todo”, a mesma ZEPA que rexeitaba o desaparecido líder de XX.AA e cabecilla da plataforma “ZEPA NON”, Francisco Bello, a mesma ZEPA á que presentaron máis de 6000 alegacións baixo a batuta do cacique provincial do PP, José Manuel Baltar, logo rexeitadas polo cacique nacional do PP, Alberto Núñez Feijóo, a mesma ZEPA só que con 5000 hectáreas máis que no proxecto orixinal do “bipartito”.

No BNG seguiremos a denunciar as mentiras do PP, empezando por Feijóo e rematando por Isaac Vila, e traballaremos para que esta declaración non a sufra o tecido económico e productivo da nosa comarca.

• Decreto 411/2009, do 12 de novembro, polo que se declara a zona de especial protección para as aves da Limia (DOG_230, 24-11-2009)

Referencias:

• Ourense Dixital (24-11-2009): El BNG pedirá a la Deputación que inste a la Xunta a derogar el decreto de la ZEPA de A Limia
• Ourense Dixital (25-11-2009): Publicado este martes en el DOG el Decreto de Medio Rural que crea la ZEPA de A Limia
• A Nosa Terra (29-11-2009): ‘Zepa Si, Zepa non’ na Limia

A deputada do G.P. do BNG, Tereixa Paz, anunciou hoxe no Parlamento que non vai volver participar en ningunha votación co PP sobre acordos para a Limia dado o valor que o grupo popular dá aos ditos acordos “e por se tratar dun grupo que permite que o Goberno devalúe o traballo de impulso da Cámara como nunca acontecera na historia do Parlamento”.

Paz Franco pronunciouse deste xeito durante o debate en comisión dunha iniciativa socialista sobre a ZEPA, que foi emendada polos populares, por considerar a actitude destes últimos de puro “cinismo”, xa que hai menos dun mes aprobouse por unanimidade nesa mesma comisión unha proposición non de lei do BNG que o goberno se pasou “polo arco do triunfo” coa aprobación no Consello da Xunta do decreto da ZEPA sen ter en conta o aprobado na Cámara.

Para a deputada nacionalista, “hai que ter a cara moi de cemento” para vir a defender agora no Parlamento unha emenda que contradí totalmente o aprobado hai catro semanas e logo da campaña que os populares fixeron na anterior lexislatura e en pleno proceso electoral, repartindo uns folletos co lema ZEPA NON, nos que alarmaban con perdas de 300 millóns de euros e 22.000 galegos que se ían ver afectados.

Segundo a parlamentar, boa proba do “papelón” que están protagonizando os populares con este asunto é que ningún dos deputados ourensanos do PP apareceu pola comisión, de tal xeito que foi Daniel Varela o responsábel de defender a emenda, demostrando, segundo Paz, que non leu o decreto que aprobou o executivo.

A deputada lembrou que o propio Feijóo, no mitin en Xinzo, comprometérase a que se el gobernaba non ía haber decreto da ZEPA e non só o houbo, senón que ademais se fixo sen a interlocución previa co sector, tal e como reclamaba a iniciativa parlamentar aprobada, nin protexendo a actividade agrogandeira, concluiu.

• Nota de imprensa – Grupo Parlamentar do BNG (pdf, 35kb)

Referencias:

• Ourense Dixital (20-11-2009): Tereixa Paz anuncia que se niega a votar asuntos relativos a A Limia ante el “cinismo” del PP

O responsábel comarcal do BNG na Limia, Xosé Manuel Pérez Bouza, anunciou esta mañá que o BNG vai iniciar unha campaña na comarca para demandar a imediata apertura da estación da Inspección Técnica de Vehículos (ITV) situada en Xinzo de Limia e rematada desde hai tempo pero aínda pendente da súa posta en marcha.

Pérez Bouza engadiu que tamén “procederemos á recollida de sinaturas na comarca e á presentación de mocións nos diferentes concellos e, se no prazo de 15 días, esta estación permanece aínda pechada, levaremos a cabo unha ampla mobilización social para reclamar a súa apertura canto antes”.

O BNG da comarca impulsou a estación de ITV en Xinzo para dar servizo á comarca

O responsábel comarcal do BNG lembrou que foi o BNG da Limia quen impulsou a necesidade de ubicar en Xinzo unha estación de ITV dado o importante volumen de vehículos, especialmente de maquinaria agrícola, coa que conta esta comarca. “Foi a Consellaría de Industria do anterior Goberno na Xunta, rexida polo BNG, quen chegou a un acordo coa empresa Supervisión e Control para construir esta infraestrutura”.

Pérez Bouza explica que Xinzo foi así unha das beneficiadas no reparto de novas  estacións de ITV na Galiza e que tiña que abrir as súas portas en setembro pasado, así estaba comprometido. Porén, a día de hoxe “e a pesar de que o edificio está rematado, segue pendente da súa posta en marcha”.

Xosé Manuel Pérez Bouza responsabiliza á actual Consellaría de Industria da Xunta porque está a retrasar o proceso de apertura en lugar de axilizalo.

• Nota de imprensa – BNG Comarcal (pdf, 24kb)

Referencias:

• Ourense Dixital (18-11-2009): El BNG de A Limia anuncia una campaña para lograr la apertura de la ITV de Xinzo

O pasado xoves 12 de novembro o BNG de Xinzo comezou unha serie de reunións informativas por distintos núcleos do rural. A deputada Tereixa Paz, xunto co senador Xosé Manuel Pérez e mailo concelleiro Amador Díaz foron degrañando a situación da ZEPA e dos Plans de Regadío, así como as iniciativas que se estaban a dar, tanto por parte da Xunta como pola banda deste grupo parlamentar, no canto de consolidar a base legal necesaria para garantir que unha hipotética declaración de ZEPA na Limia non interferise nin no desenrolo da peculiar, mecanizada e intensa actividade agraria desta comarca, nin na futura posta en marcha de infraestruturas agrarias estratéxicas como os Plans de Regadíos.

Neste senso, cabe engadir, que todos concluíron que se houbera que facer un “test de fiabilidade” ao PP ao respeito da ZEPA o resultado sería un suspenso en toda regra, por tres cuestións fundamentais:

1. Por incumprimento do acordo parlamentar unánime do 23 de outubro.
2. Por aprobar un Decreto de costas á cidadanía da Limia e de costas tamén aos intereses produtivos desta comarca estratéxica.
3. Por traizoar mesmo as promesas feitas durante a pasada campaña electoral onde no mitin central do PP de Xinzo o mesmo Feijoó proclamou que se era presidente, ZEPA NON.

Queda de manifesto, por tanto, a “total incoherencia” do Partido Popular sobre este asunto, pois hai dous anos estaba totalmente en contra do decreto, “azuzaban” aos afectados para que se opuxeran ao mesmo e incluso repartían folletos co lema “ZEPA NON” e agora aproban a norma tal cal a de 2007 en Consello da Xunta, o que vai supor, “segundo constaba no folleto”, que 22.000 galegos se vexan afectados e unhas perdas de 300 millóns de euros, por “irresponsabilidade e total incoherencia”.

O BNG reitera o seu compromiso de seguir a traballar para evitar que esta declaración hipoteque o futuro produtivo do sector agrario na Limia e ofrece todo o seu apoio á cidadanía animándoa a defender os intereses da súa comarca.

• Nota de imprensa (pdf, 92kb)

Referencias:

• Faro de Vigo (15-11-2009): El BNG recuerda a Feijóo su promesa de que si era presidente diría “no” a la Zepa
• La Voz (15-11-2009): El BNG rechaza la declaración de ZEPA de A Limia por hacerse de «costas á cidadanía»

Para informar ás veciñas e veciños das últimas novidades sobre o longo proceso de declaración da ZEPA na Limia e descobrir as mentiras, incoherencias, terxiversacións e manipulacións do Partido Popular, editamos este trítico que será distribuido nas charlas que celebraremos en diversos núcleos do rural do noso concello. Nel recóllese, resumido, o posicionamento do BNG sobre a declaración da ZEPA así como unha cronoloxía que permite comprobar o descarado cambio de discurso do PP  en todo o referente a este tema dende que comezou hai dous anos, virando do “ZEPA NON” de cando estaba na oposición ao “ZEPA SI” agora que (des)goberna a Xunta.

• Trítico ZEPA A Limia / novembro 2009 (pdf, 128kb)

O portavoz do Grupo Parlamentar do BNG, Carlos Aymerich, e a voceira de Medio Rural, Tereixa Paz, anunciaron hoxe que se dirixirán á Mesa da Cámara para pedir amparo pola vulneración que este goberno fai dos acordos acadados no Parlamento, nomeadamente o que se adoptou por unanimidade o 23 do pasado mes de outubro ao respeito do decreto da Zepa. Tereixa Paz asegurou que se trata dun ataque “sen parangón” ao traballo parlamentar e pon de manifesto que o grao de fiabilidade do PP xa non só cae en picado senón que a partir de agora “xa non podemos nin acreditar nas iniciativas que apoian nesta Cámara”. Neste sentido, engadiu que se houbera que facer un “test de fiabilidade” ao PP o resultado sería un suspenso en toda regla, por tres cuestións fundamentais: incumprimento do acordo, aprobar un decreto de costas ao Parlamento e á cidadanía da Limia e de costas tamén aos intereses produtivos.

Para Paz, queda de manifesto, por tanto, a “total incoherencia” do Partido popular sobre este asunto, pois hai dous anos estaba totalmente en contra do decreto, “azuzaban” aos afectados para que se opuxeran ao mesmo e incluso repartían folletos co lema “ZEPA NON” e agora aproban a norma tal cal en Consello da Xunta, o que vai supor, “segundo constaba no folleto”, que 22.000 galegos se vexan afectados e unhas perdas de 300 Millóns de euros. “Irresponsabilidade e total incoherencia”, reiterou a deputada. A parlamentar nacionalista lembrou que o acordo acadado no Parlamento non era de difícil cumprimento senón moi concreto e taxativo, pois establecía que antes de adoptar calquera decisión, o goberno da Xunta reanudaría o diálogo cos afectados e a creazón da Zepa cumpriría unha serie de condicións para compatibilizar o respeto ao hábitat das aves co mantemento das actividades agrarias, tal e como sempre demandou o BNG e polo que seguirán traballando.

Pola súa parte, Carlos Aymerich sumou esta “nova falta de respecto” de Núñez Feijóo e o PP ao Parlamento ás “mentiras” nos debates plenarios que caracterizan a este goberno, ás tramitacións de proxectos de lei polo trámite de urxencia, cando a única presa que as xustifica, na súa opinión, son as “urxencias do PP e dos seus amigos” -como o caso do eólico e a lei de pesca-, ou aos vetos ao debate de determinadas Iniciativas Lexislativas Populares. Aymerich preguntouse, ante este cúmulo de exemplos, onde está a rexeneración democrática prometida por Núñez Feijóo, “non sei se queda para outra vida, en calquera caso si para outra lexislatura”, concluiu.

• Nota de imprensa – Grupo Parlamentar do BNG  (pdf, 36kb)

Referencias:

• La Región (12-11-2009): El BNG pide amparo al Parlamento por ‘vulneración’ de un acuerdo sobre la ZEPA de A Limia, aprobada por el Consello
• La Región (12-11-2009): La Xunta valida la ZEPA para A Limia con la promesa de que ‘no dañará la agricultura’
• Ourense Dixital (12-11-2009): O Consello da Xunta aprobará este xoves o decreto da ZEPA de A Limia de casi 7.000 hectáreas
• A Nosa Terra (12-11-2009): O BNG pide amparo ao Parlamento por vulneración dun pacto sobre a ZEPA da Limia
• Ourense Dixital (13-11-2009): O BNG denuncia “vulneración” no caso do decreto polo que se crea a ZEPA de A Limia
• Radio Limia (13-11-2009): El BNG reclama que se cumplan los acuerdos parlamentarios sobre la ZEPA
• La Voz (13-11-2009): La Xunta declara zona de protección de aves 6.939 hectáreas de A Limia | Críticas por la falta de diálogo con los implicados
• Galicia-Hoxe (13-11-2009): Críticas á luz verde “sen consenso” da ZEPA da Limia
• Xornal.com (13-11-2009): O BNG critica a aprobación da ZEPA da Limia